“Müasir Azərbaycan” adlı inşa müsabiqəsi

Bildiyimiz kimi “28 may” Azərbaycan respublikasının tarixində çox önəmli günlərdən biridir.

1918-ci il may ayının 28-də Şərqdə ilk demokratik respublika-Azərbaycan Xalq Cümhuriyyəti yarandı. Bu hakimiyyət 23 aylıq fəaliyyətdən sonra 1920-ci ilin aprelin 27-də süqut edib.

İllər sonra, daha düzünü desək 71 il sonra Azərbaycan xalqı öz dövlət müstəqilliyini yənidən bərpa etmişdir.
Müstəqil yaşamaq, öz dövlətini qurmaq hər bir xalqın arzusudur. Azərbaycan xalqı da həmişə bu istəklə yaşamışdır. Tarixdə zaman-zaman müxtəlif adlar altında müstəqil Azərbaycan dövlətləri mövcud olmuşdur. Buna misal kimi müxtəlif dövrlərdə tarixi Azərbaycan torpaqlarında yaradılmış Şirvanşahlar, Eldənizlər, Ağqoyunlu, Qaraqoyunlu, Səfəvilər dövlətlərinin adını çəkə bilərik.

Həmin vaxtdan bəri xalqımız azad yaşayır, öz milli dövlətini möhkəmlədərək inkişaf etdirir.

Qısa müddətdə müstəqil Azərbaycan siyasi, sosial-iqtisadi, mədəni sahələrdə böyük nailiyyətlər qazanmışdır. Respublikamızda dövlət müstəqilliyinin bütün atributları bərqərar edilmişdir. Dövlət gerbi, himn, üçrəngli bayraq müstəqil dövlətimizin rəmzləridir. 1995-ci ildə müstəqil Azərbaycanın ilk Konstitusiyası qəbul olunub.Respublikamızda dövlət quruculuğunun əsasları bu Konstitusiya ilə təsbit olunub. Konstitusiyamıza əsasən, Azərbaycan demokratik, hüquqi, dünyəvi bir dövlətdir və ölkədə hakimiyyətin yeganə mənbəyi xalqdır. Müstəqil Azərbaycanın həyatında başqa bir əlamətdar hadisə 1994-cü ilin əvvəlində baş vermişdir – milli valyutamız manatdan ölkədə yeganə ödəniş vasitəsi kimi istifadə olunmağa başlanılmışdır.

Bütün bunların sayəsində respubilikamızda həyat dəyişir, insanların rifah halı yaxşılaşır, yeni-yeni sosial layihələr həyata keçirilir, paytaxda, bölgələrdə genişmiqyaslı tikinti-abadlıq işləri aparılır. Yeni tikilən göydələnlər, nəhəng körpülər, rahat yollar müstəqil Azərbaycanın getdikcə artan iqtisadi qüdrətindən xəbər verir. Azərbaycanın dövlət müstəqilliyi xalqımızın tarixi nailiyyətidir. Müstəqil dövlətimizin qədrini bilmək, onu qorumaq, inkişafına əlimizdən gələn köməyi göstərmək hər birimizin müqəddəs borcudur.

Bildiyimiz kimi, bu cür əlamətdar günlərdə heç də hər bir orta məktəbdə tədbirlər keçirilmir. Bu gün orta məktəb şagirdlərinə vətənə məhəbbət, onun rəmzlərinə hörmət və s. kimi hisslərin aşılanma dərəcəsi elə də ürəkaçan deyildir. “28 May” tarixini bayram günü kimi qeyd edirik, amma, heç də hamı bu günün nə üçün bayram günü kimi qeyd edildiyini bilmir.

Təqvimimizdə olan bu cür günlər şagirdlərin yaddaşında sadəcə istirahət günü kimi qalmaqdadır. Bu və başqa əlamətdar günlərdə, orta məktəblərdə əlavə tədbirlər keçirilmir və ya keçirilsə belə sadəcə standart mühazirə kimi olur ki, bu da adi dəsrslərdən fərqlənmir.